کوردستانی
روونکردنەوەیەک بۆ هەوادارانی پڕۆژەی ئیسلامی لەکوردستان ‌
  21/06/2017
  253
روونکردنەوەیەک بۆ هەوادارانی پڕۆژەی ئیسلامی لەکوردستان د. خالید محه‌مه‌ ساڵح بەڕێزان، بۆ دوساڵ دەچێت هەموومان پێکەوە سەرقاڵی پڕۆژەی یەکخستنەوەی نێوماڵی ئیسلامین، سوپاس بۆ خوا لەو پێناوەیشدا هەنگاوی باشمان ناوەو کۆسپ و بەربەستی زۆرمان بڕێوە، ئێستایش کە نزیکدەبینەوە لەوادەی هەڵبژاردنەکان، پێمخۆشە ئەم چەند خاڵە لەسەر خودی پڕۆژەکەو ئامانجەکانی بخەمەڕوو: 1- ئامانجی پڕۆژەکە: ئامانجی سەرەکی پڕۆژەکە، پاش بەدەستهێنانی ڕەزامەندی خوای گەورە، دەربازکردنی پڕۆژەی ئیسلامییە لەو حاڵەتی ئیفلیجی و چەقبەستویی و بشێویەی کە تووشی هاتوو، کە پاش چارەکە سەدەیە لەکارو هەوڵی بەردەوام، پڕۆژەکەی ئێمە هێشتا جێگای متمانەی لە (١٧%) خەڵکی کوردستانە؛ بۆیە ئەم پڕۆژەیە ئامانجی درێژخایەنی هەیەو بۆ قۆناغ، یان کار یان کاتێکی دیاری کراو نەهاتۆتە بوون و هیچ کام لەو فاکتەرانەیش پەکی ناخەن. 2- بیرۆکەی پڕۆژەکە: پڕۆژەکە هی هەموومانەو دەبێت هەموویشمان بەگیانی بەرپرسیارێتیەوە مامەڵەی لەگەڵ بکەین، نەک لەپێناو خۆ دەرخستن یان یان موزایەداتی سیاسی یان زیادکردنی لایک و کۆمێنتی پەیج و ئەکاونتەکانمان، بەپێ خاوسی بکەوینە ناوی قسەی بێبنەماو بریندارکەری لەبارەوە بکەین و زیان بەداهاتووی پڕۆژەکە بگەیەنین. 3- ڕۆڵی ئێمە: تایبەت بەو کەسایەتی و ڕێکخراوانەی لەپڕۆژەکەدان، ئێمە هەر لەسەرەتاوە ڕۆڵی نێوەندیگری و چاودێریمان هەڵبژاردووە، بۆیە بەداوای لێبوردنەوە هەرکەسێک یان ڕێکخراوێک ئەو ڕۆڵە لەدەست بدات و سەنگەر لەلایەنێکی پڕۆژەکە بگرێت، ئەوە ئەو ئازادە، بەڵام ئێمە لەپێناو بەرژەوەندی گشتیی پڕۆژەکە ناتوانین جارێکی تر وەک بێلایەن یان چاودێر تەماشای بکەین و مامەڵەی لەگەڵ بکەین. 4- هەڵوێستی لایەنەکان: لایەنەکان کۆکن لەسەر بەدەوامی لەپڕۆژکە و هەموویشمان کۆکین لەسەر ئەوەی هەر بڕیارێک بدەین، بەتوافق دەبێت ئەگەر نا ئەوە پێویستە لایەنەکان ڕێز لەبڕیاری یەکتر بگرن هەرچی و هەرچۆن بێت. 5- پرسی هەڵبژاردن: هەرچەند ئاواتی ئێمەو جەماوەی ئیسلام دۆستی کوردستانیش ئەوەیە کە بۆ هەڵبژاردنی داهاتوو ئیسلامییەکان یەک لیستیان هەبێت، بەڵام لەوانەیە ئەو کارە زەمینەسازی زیاتری پێویست بێت، بۆیە ئەگەر بۆ ئەم قۆناغەیش یەک لیستی نەکرا، ئەوە واتای کۆتایی دونیا نییەو ناکرێت ئێمە بۆ بانگەشەی هەڵبژاردن و لەپێناو بەدەستهێنانی کورسی بکەوینە گیانی یەکتر؛ چونکە کاری ئیسلامی زۆری ماوەو کاتیش زۆر لەبەردەستایەو دەکرێت ئێمە دواتر فراکسیۆنەکانمان یەک خەین و کار لەسەر یەکهەڵوێستی و یەکپڕۆژەیی بۆ داهاتوو بکەین. 6- یەک هەڵوێستی دەربارەی پرسە نیشتمانی و نەتەوەییەکان: دیارە ئێمە تا ئێستا وەک لایەنەکانی ناو پڕۆژەکە، هەڵوێستمان لەمەڕ زۆرێک لەپرسە چارەنووس سازەکانی تایبەت بەهەرێم جیاوازەو یەکهەڵوێست نین بەرامبەریان، ئەوەی گرنگە ئەوەیە ناکرێت هەڵوێستی هیچ لایەک بەرگی ئیسلام و شەرعی بکرێت بەبەردا و هەڵوێستی بەرامبەری پێ سەرکۆنە بکرێت؛ چونکە کۆی هەڵوێستەکان لەبازنەی سیاسەت و ئیجتیهاد ناچنە دەرەوەو پەیوەندیان بەحەڵاڵ و حەرامەوە نییەو دەرەنجامیش نازانرێت پێشبینی کێ ڕاست دەردەچێت، باخۆیشمان دابەش نەکەین بەس هیچ بەرەیکداو هەوڵ بدەین پێکەوە بەرەیەک پێکبهێنین کە خەڵکی بەش مەینەتی ئەو هەرێمە لەم دۆخە نالەبارە ڕزگار بکات. 7- پاش جەژن پشت به‌خوا لیژنەی کارگێڕی و دەستەی باڵا دانیشتنەکانی دەستپێدەکاتەوەو زەمینەسازی بۆ هەنگاوەکانی داهاتوو دەکرێت. 8- لەکۆتاییدا دەمەوێت ئەو تکایە لەهەموو لایەک بکەم، کە خۆی بەدڵسۆزی پڕۆژەی ئیسلامی دەزانێت لەکوردستان، با لە گۆشەی بەرتەسکی حیزبایەتی و پیرۆزکردنی سەرکردەو دروشم بێنە دەرەوەو بچینە بازنە فراوانەکەی پەیامەکەی خوای گەورەوەو هەموومان وەک برا مامەڵە لەگەڵ یەکتر بکەین و هەوڵ بدەین یەک دەست و یەک مەبەست بین و خۆشی و ناخۆشیەکانمان ئاوێتەی یەکتر بکەین و بەگیانی بەرپرسیارێتیەوە مامەڵە لەگەڵ پرسی برایەتی و یەکڕیزی نێوان مسوڵمانان بکەین و خۆمان لەتانەو توانج و قسەی نەشیاو بریندارکەر بپارێزین، چونکە هەموو ئەوانە حەرامن و خزمەت بەبەرژەوەندی هیچ لایەکمان ناکات. با هەموویشمان لەم شەوە پیرۆزانەدا زۆر لەخودا بپاڕێینەوە کە دڵەکانمان یەکخات و چی خۆی بەباشی دەزانێت ئەوەمان بۆ بکات و لەکەم و کورتی هەموو لایەکمان خۆش بێت. پ.د. خالد محمد صالح ٢٤/ڕەمەزان/ ١٤٣٨ ١٩/٦/٢٠١٧

زیاتر ...
په‌ڕه‌یله‌ 8
ژماره‌ی بابه‌ت